آخر الأخبار
جوهرة العرب : محبوب فهيد القرني - المملكة العربية السعودية
يامغربي بالّلَه وش يخفي الّليل؟
موحش تدلهامه وصمته مهابة
تعبت ادوّر بالأصايل لتأويل
ليه الشّفق شمسه تقاطر صبابة؟
تحمرّ دايم في أُفق يشبه الويل
قرص الذّهب يغرق بحانة كآبة!!
وغيابها حبكة تلاشي و تضليل
نور ولبس ضلماه،، واسبل ثيابه
لين العتيم يحيط كلّ التّفاصيل
بالفلسفة،،،بالأسئلة،،،بالإجابة
ماكان بالمغرب مطر بالمساء سيل
اللّيل تكويّنه رواية غرابة
وش خلف ظلما طرّزتها القناديل؟
مازانت الا في عيون الغلابة
وش سرّ صمتٍ في سكونه تراتيل؟
يجترّ إيقاعه رتابة….....رتابة
ليه النجوم يطيح منها مقاتيل؟
اللّيل ضحّى لو بضاوي شهابه!
ليه القمر من يكمَل،،لنقصه يميل
كنّه يغذّي من ضياه السحابة!
يامغربي واضن ماعاد بك حيل
اللّيل واسع وانت مابك رحابة
وش حيلتك واللّيل يفرض محاصيل
وانت اول القتلى بطعنة حرابه
وانا مجرّد روح بمروره تسيل
اجدبت تايه خلف مشهد سرابه
اللي فهم زيفه قضاه بتعاليل
ماينتظر،، مايستثير استجابة
من بُكرة اصدح في غروبي مواويل
واحمّل همومي لخيط الرّبابة
اما الخبايا ماكشف سرّها ليل
كتمان سرّ الليل،،سرّ المهابة
محبوب فهيد