دبكة كورونا ..! .. كتبت الإعلامية إيمان عكور

جوهرة العرب - ايمان عكور

بعد مرور اقل من 24 ساعة، ورغم التعليمات والتحذيرات ، وما بين فرحتنا بتسجيل صفر لليوم الثامن وخوفنا من الآلاف من ابنائنا الذين بدأوا يصلون الوطن.. ها هي بشائر الخير هلت بقدومهم.!

دبكة وشبك ايدين ورقصني يا كورونا..!

معقولة هالاستخفاف.. يعني ما حللكم تزهقوا من قعدة الكارافان حتى تطلعوا ترفهوا عن حالكم.. انتظروا كم يوم عالاقل علشان نفرح بعودتكم.. ونقول انه فعلا الوطن واحنا ضحينا علشانكم.. وانتو فعلا بتستاهلوا..!

قدروا جهود هالمساكين من كوادر الجيش والامن اللي ما راحوا بيوتهم الا كم يوم من شهرين علشان يأمنولكم مكان يحافظوا فيه على صحتكم وصحة اهلكم..! 

لكن للأسف..  كسفتونا ( وطبعا اتكلم عن الشلة التي لم تلتزم بالتعليمات) في حين كان هناك اكثر من الف احترموا الوضع..

مش عارفة كيف اهلكم كانوا مأمنين عليكم خارج الاردن..!

معقولة ما بيعرفوا انو في اوامر دفاع؟؟، ومعقول ما في حدا خبرهم على واتساباتهم، وعلى ايميلاتهم، انو في اشياء ممنوع منعا باتا عملها.. مش معقول  يكونوا عرفوا شو المسموح وشو الممنوع وتصرفوا هيك؟؟؟؟

اكيد بتقدروا تتواصلوا معا.. لكن ضمن شروط سلامة عالية.. لا تنسوها

لكن وبنفس درجة استيائي من تصرفكم، يخطر ببالي ايضا عدة تساؤلات.. الأجوبة فيها عند الحكومة وادارة الازمة..!

برأيكم اليس تصميم مثل هكذا مخيم لشباب كي يحجروا به 17 يوم دون اي اختلاط هو ضرب من الجنون..

الكارافانات متلاصقة لدرجة الكورونا

لم يتم توزيعها على مجموعات بمساحات متباعدة لتقليل مثل هذ الاختلاط..!

من غير المعقول ان يبقى الطالب ملتزما طوال المدة استنادا فقط على وعيه، هل فكرتم اذا بامكانية نشر شرطة ما بين الكارافان والاخر لضبط هكذا تصرفات قد تصدر من البعض وتؤثر عليناجميعا.. طبعا من غير المعقول هذا الأمر، المراهنة كانت على وعي الطلبة وواضح الرهان خاسر..!

اعتقد لو تم استخدام كافة الفنادق والشقق المفروشة بكل نجومها لكان التباعد والسيطرة على الامر افضل.!

لابد من اعادة النظر في توزيع الكارافانات. 

هناك 15 يوم لسة.. واتمنى الا يكون القادم أسوأ..! ونعود لنقطة الصفر بسبب استخفاف شباب بلا مسؤولية او حتى سائق شاحنة اخفى موضوع سفره وثبت بعدها انه مخالط وكان خارج الأردن..!

اليوم كنت في جولة في البلد ومناطق وادي الرمم والوحدات.. بأكدلكم الوضع هناك ما اله اي دخل بالسجن الي بنعيشه.. الناس بالمئات بالشوارع.. تجمعات.. طوابير امام الصرافة والبنوك بتباعد اقصاه 30 سم..

يعني دبكة الشباب يمكن اقل خطرا..!

لابد من اعادة النظر في الية الحجز، ومن تغليظ العقوبات حتى نخلص من هالكابوس. 

اعلم لا يمكن ان يكون هناك شرطي على كل شخص.. لكن اتمنى ان نكون اكثر وعي، خلونا نرجع لحياتنا.. بكفي استهتار..!

حرام اهلكم اللي هلكوا وهم يحلمون بعودتكم

بلاش تفشلوهم..!

من حقكم انه تفرحوا بعودتكم بعد طول خوف وانتظار.. لكن انتظروا هالاسبوعين..! 

بنترجاكم..

خلونا نخلص.. وبعدين بنشبك سوا كلنا للدبكة احتفالا بانتصار الوطن..!