آخر الأخبار
جوهرة العرب : الشاعر محبوب فهيد
العيد فرحة لو يجينا في نهار المصيبة
يبقى شعيرة ما تبدّل بالزّمان وظروفه
العيد بسمة والفرح مهما تباعد تجيبه
متشكّلة من حسّ طفلة عقدها من حروفه
مافكّرت في ركن خالي من حبيب وحبيبه
ماهمّها مجلس كريم شهور ماجو ضيوفه
ماهالها ثوبٍ معلّق خالط الغبر طيبه
ما حرّها ذاك الأريج اللي يجفّ برفوفه
ترقص براءة والألم ما طال منها نصيبه
لبسٍ جديد وعقد عيد ونقش زينه كفوفه
كنها تقول الكون فوقه يابن آدم رقيبه
لاتحرق اوقات الهنا في منزلك بالحسوفة
لو كانت الحالة نعم بالفعل جداً غريبة
فترة تعدّي والزّمن لابد تقسى صروفة
لاشك بامر الله هالمارد بساعة مغيبه
وتعود حرّيّة غدت كانت من اثمن قطوفه
والفايتة هاليوم بكرة بامر ربّي قريبة
نرقب فرج في موعده ماباقي الا نشوفه
يالله يارحمن فرج كربنا والمصيبة
حتى شروق العيد مستغرب فضاعة ظروفه
الشاعر محبوب فهيد