آخر الأخبار
جوهرة العرب
الزمالك حكايه عشق
بقلم :سمر يوسف
أنا زملكاوية…والزمالك بالنسبة لي مش نادي،
دي حكاية، عُمْر، ذكريات طفولة،
حالة وجدانية مش قابلة للتفسير…
زي لما تقع في حب حد من غير ما تعرف ليه، ولا إمتى، ولا إزاي،
بس تفضل تحبه رغم كل حاجة.
آه، زعلنا امبارح.مش بس من الإعلان…
زعلنا من المستوى اللى وصلناله من قلة الاحترام والتعصب، والطريقة اللي حاولوا بيها يصغرونا، ويتهكموا علينا.
بيصدروا صورة إن قطبي الكرة المصريه أعداء، ولا كأنها حرب!
ياعزيزى الزمالك أعظم منافس ليك،
ويوم لقاءك بيه… مصر كلها بتقف على رجل واحدة.
الإعلان طلعنا "مجانين"؟
أيوه، إحنا فعلاً مجانين بالزمالك،بس الجنون ده مش تهمة…
ده شرف ووسام و شهادة عشق ياعزيزى
زعلت من الطريقه اللى بتتعامل بيها مع جمهور عظيم ، واعي، ذكي، فاهم، صابر على الهم، ومكمّل رغم الإحباط.
وهو برضوا اللى علِّمك امبارح درس خسرك بيه ملايين
شركة خدت قرار غلط،
وخسرت الشريحة الأكتر وعيًا، والأكثر وفاءً، والأقدر على التمييز.
أنا مش جاية أبرر حبي،
ولا أشرح يعني إيه "زملكاوي" لحد ما يعرفش.
اللي مش فاهم مش هيفهم،
بس اللي زيي… اللي بيحب الزمالك،
عارف إن الموضوع مش "كورة وبس".
أنا لما بزعل على الزمالك،
مش بزعل عشان لاعب ولا بطولة،
أنا بزعل عشان فرحتي،
عشان آخر شئ حلو استثنيته وبعشقه وفى دمي،
عشان قيمة… حاسة بيها ومعتزة بيها.
لسه عندي حاجة أستنّاها،
نادي لما يكسب باطير من الفرحة، واقعد اتنطط واخبط في السقف كمان من فرحتى بالفوز..
ومحدش يجي يقولي:كورة ايه وبتاع ايه ؟
"الناس بتموت؟ في ناس جعانة؟!"
"واللاعيبة بتاخد ملايين ومش فارق معاهم؟"
انا هنا لا باتكلم على كورة ولا باتكلم فى سياسه
انا باتكلم فى ثقافه وذوق عام ..ومستوى اخلاقى بتصدروه لجيل المفروض يطلع مش متعصب وفاهم ان الرياضه منافسه شريفه لا اكثر ولا اقل
ياجماعة ..حبى للزمالك مش لازم تعذّروه،
لكن لازم تحترموه.
الزمالك ممكن يمرض،
من الفساد، من القهر، من الصفقات البايظة،
من السنين اللي انضغط فيها لحد ما نفسه اتكتم…
اه الزمالك بينهار يمكن !.. لكن عمره ما هيموت.
حى في قلوبنا، في حلم طفل ورث حب الزمالك من باباه أو مامته،
في صبر مشجع بيحضن الفانلة تاني يوم الخسارة.
الزمالك عمره ما كان ابن السُلطة،
ولا طفل مدلل في حضن الإعلام،
الزمالك دايمًا في وش العاصفة…
وبيكمل. بيكمل برجولته، بتاريخه، بجمهوره…
اللي حبوه من غير مصلحة، ومن غير مقابل.
أنا زعلانة من الاستهانة،...وأنا اللي مهما حصل
عمرى ما اتجاوزت ولا حفلت على الأهلي ولا شتمت،
بالعكس… بافرح وأهني، وعمري ما فرحت بكسر حد،
لكن للأسف… بشوف ناس بتحاول تكسّر فرحتنا دايمًا.
ناس نسيت إن الكورة كانت وسيلة فرح،
ويوم غالب… ويوم مغلوب.
الزمالك ياسادة … نادٍى عظيم
وإحنا؟ هنفضل نحبه،
بجنونه، بخسارته، بانكساره…
من قلب زملكاوية…من الإهانة امبارح كانت موجوعة،
بس النهاردة راسها مرفوعة… برد وموقف الزمالكاوية الشديد منكم فى الكام ساعه اللى فاتوا .. واللى خسركوا كتير
وباقول للقائمين على الإعلان: من قلب ابيض بخطين حُمر بيحب ناديه ..وبيعترض بأدب وبإحترام ..
الرياضة أخلاق…يا عديمي الأدب والأخلاق
اه وبالمناسبه الصورة دى ظهرتلى فى الميموريز
زى النهاردة من سنه 19_5_2024
الزمالك كان بطل الكونفدرالية
شير وريهم يعنى ايه زملكاوي
الباشمدرسة. يوميات وزيره السعاده